Nýggjur havmyndil fyri Føroyar

Havtoymið á Veðurstovu Føroya (Knud Simonsen, Jari í Hjøllum og Bárður A. Niclasen) hevur síðani á sumri 2024 arbeitt við at menna ein havmyndil fyri føroyska sjóøkið. Nú er komið so langt, at fyrsta ”beta” útgávan er løgd á heimasíðuna.

Við í myndlinum eru:

• Eitt sjóøkið, ið fevnir um allan landgrunnin og næstu bankarnar vestanfyri.

• Stutt millum roknipunktini niður í 50 m inni við land, men longri millum roknipunktini úti á djúpum havi.

• Astronomiska sjóvarfallið við 8 konstituentum.

• Avrenning við áunum, sum tó er savnað í 279 høvuðsáir og fyribils við miðalavfalli.

Í hesari fyrstu sleppingini eru kort, sum vísa vatnstøðuna og rákið fyri hvønn hálva tíma frá degnum undan og 5 dagar fram. Hetta eru úrslit frá koyringum við myndlinum, sum sjálvvirkandi verður settur í gongd at rokna hvørt samdøgur við seinastu tøku tølunum fyri drívkreftunum. Fyribils er bert ávirkanin av sjóvarfallinum og áunum við í myndlinum. Arbeitt verður við at knýta havmyndilin saman við veðurforsagnirnar, soleiðis at ávirkanin av veðrinum á rák og vatnstøðu eisini er við.

Myndilin sæst á www.vedur.fo/fo/havkort .