Franskur verkfrøðilesandi hevur kannað eystanstormin í novembur 2024

Fríggjadagin 22. august var seinasti dagurin hjá Johann Geay verkfrøðilesandi við Institut National des Sciences Appliquées (INSA) í Lyon í Fraklandi á Veðurstovuni. Hann er á fjórða árinum í lesnaðinum til verkfrøðing á deildini fyri Orku og Umhvørvið á INSA, Lyon. Partur av lestrarætlanini har er 4 mánaðar starvsvenjing úti hjá einari fyritøku ella granskingarstovni, sum Johann Geay nú hevur framt við at verða á Veðurstovuni.

Í hesum fýra mánaðirnar hevur hann kannað, hvussu veðurmyndlarnir hjá Veðurstovuni megna at lýsa storm hendingina, sum serliga rakti lendi kring gamla løgmanssætið á Steig í Sandavági og vinnubygningar á Giljanesi. Ongin veðurstøð er í hesum økinum, so í fyrsta umfarinum varð samanborið við næstu veðurstøðirnar. Her vóru støðirnar í Tórshavn og Mykinesi, sum Veðurstovan rekur, og vegstøðirnar hjá Landsverk á Vatnoyrum, Hálsinum við Sandavág, Høgareyn og Velbastaðháls brúktar. Úrslitini frá hesum samanberingunum eru brúktar til at gera ymsar stillingar í veðurmyndlunum. Hetta er liður í strembanini at tillaga veðurmyndlarnar til serligu føroysku viðurskiftini. 

Arbeiði hesar 4 mánaðirnar er samanfatað í drúgvari frágreiðing, og í einum samandrátti framleiddur sum vísindapostari. Hetta er eitt av krøvunum hjá lestrastaðinum. Har umframt vóru úrslitini løgd fram í framløgu, sum Johann Geay helt á seminari tann 15. sept, sum Veðurstovan helt fyri umboðum fyri stovnar og feløgum, ið hava víst áhuga fyri at fáa framleitt eitt neyvari vindatlas fyri Føroyar. 

Í INSA, sum var sett á stovn í 1957, eru í dag 13 læru- og granskingar stovnar í Fraklandi, sum hava til endamáls at geva íblástur til vinnufólk og vísindafólk við íverksetan og innovation og at útbúgva verkfrøðingar og arkitektar á Bachelor, Master og PhD-stigi. Á INSO kampus í Lyon, har Johann Geay nú ger lesnaðin hjá sær liðnan, eru um 45.000 lesandi, og á deildini fyri Orku og umhvørvið eru um 3000 lesandi. Hóast ómetaligur stórur munur er á hesum stovninum og lítlu lutfalsliga ungu Veðurstovuni, so hevur tað verið ein stór gleði, og til stórt gagn fyri Veðurstovuna, at havt ein av teirra lesandi í starvsvenjing.  

Leinkja til INSA, Lyon: https://www.insa-lyon.fr

Leinkjan til INSA-bólkin: https://www.groupe-insa.fr

Forsíðumynd: Úrslit úr frágreiðingini hjá Johann Geay, sum hevur verið í starvsvenjing á Veðurstovuni. Myndin vísir úrslit av myndlan av eystan storminum 24. novembur 2024, við smáum broytingum í einum parti av myndlinum. Hóast munirnir ikki eru stórar í tí stóru veðurmyndini, so eru tær avgerandi fyri at fáa tað rættast møguligt á einum ávísum staðið.