Hagtøl

Vindur

Grafarnir niðanfyri vísa vindin (miðalvindin, mesta miðalvindin og harðastu hvirluna) og hvussu nógvir dagar tað hava verið við vindi yvir nøkur mørk í Havn í 2025. 

Miðalvindurin í 2025 var 6,0 m/s, miðalvindurin var minstur í juli (3,8 m/s) og mestur í februar (8,1 m/s).

Mesti miðalvindurin er í januar, har tað var ein ódn, ið hevði ein miðalvind á 30,3 m/s. Harðasta hvirla er undir somu ódn, hon var 43,7 m/s.

Í 2025 vóru 160 dagar við vindi yvir 10,8 m/s. Av hesum vóru 11 dagar við vindi yvir 20,8 m/s, 3 dagur við vindi yvir 24,5 m/s og 1 dagur við vindi yvir 28,5 m/s.

Hiti

Grafarnir niðanfyri vísa hitan (miðal av minsta hita, miðalhitan og miðal av mesta hita), mesta & minsta hita og hvussu nógvir frostdagar í Havn í 2025. 

Miðalhitin í 2025 var 8,1 stig. Heitasti mánaði var juli, tá vóru í miðal 12,5 stig, og tann kaldasti mánaði var januar, tá vóru í miðal 3,6 stig.

Kaldasti dagur í 2025 var í januar, tá var mált -5,2 stig. Heitasti dagur í 2025 var í juli, tá var mált 18,4 stig.

Tað vóru 25 dagar har hitin var undir frostmarkinum (kallaðir frostdagar), flest teirra (14 dagar) vóru í januar.

Avfall

Grafarnir niðanfyri vísa samlaða avfalli, mesta 24 tíma avfalli og hvussu nógvir dagar tað hevur regna meira enn 0,1 mm og 10 mm í Havn í 2025

í 2025 kom tað 1117,6 mm avfalli. Mesta avfallið var í mars, tá vóru 136,0 mm. 

Mesta avfalli í 24 tímar er mált til 42,8 mm avfall, hetta var í mai.  

Í 2025 vóru tað verið 264 dagar við meira enn 0,1 mm avfall, flest teirra (27 dagar) vóru í juni. Tað vóru 32 dagar við meira enn 10 mm avfall, flest teirra (5 dagar) vóru í januar og oktober.

Trýst

Grafurin niðanfyri vísur miðaltrýstið í Havn í 2025. 

Miðaltrýstið í Havn í 2025 var 1008,4 hPa. Hægsta málda trýstið var 1017,0 hPa í apríl, meðan lægst málda trýstið var 1003,3 hPa í juni. 

Grafarnir niðanfyri vísa miðalvindin í 2025 samanborið við klimanormalin fyri 1991-2020, mesta miðalvindin í 2025 samanborið við klimanormalin fyri 1991-2020 og harðastu hvirlu í 2025 samanborið við harðastu hvirlu í 2014-2020 og miðalvindin býtt í árstíðir í 2025 samanborið við klimanormalin fyri 1991-2020. 

Miðalvindurin í 2025 var 6,0 m/s, tað er 0,6 m/s minni enn í 1991-2020, tá var miðalvindurin 6,6 m/s. í sjey mánaðar var miðalvindurin minni í 2025 enn í 1991-2020, 4 mánaðir vóru næstan líka (± 0,1 m/s) og bert ein mánaði (oktober) hevði meira vind í 2025 enn í 1991-2020 (0,6 m/s meira). 

Mesti miðalvindurin í 2025 var í januar, har tað var ein ódn, ið hevði ein miðalvind á 30,3 m/s. Í 1991-2020 var mesti miðalvindurin í desember, tá var ein ódn, ið hevði ein miðalvind á 37,2 m/s. 

Mesti miðalvindurin er lægri í 2025 enn í 1991-2020 allar mánaðar uttan mars, tá er 2025 0,2 m/s hægri enn 1991-2020. 

Sum við mesta miðalvindi er harðasta hvirla í 2025 í januar (43,7 m/s) og í 1991-2020 er hon í desember (52,4 m/s). 

Hvirlurnar í 2025 eru sterkari enn í 1991-2020 í fyrru helvt av árinum, uttan í apríl har er hon veikari. Í seinni helvt av árinum eru hvirlurnar í 2025 allar veikari enn í 1991-2020. 

Verður árið býtt í árstíðir sæst ein klárur tendensur til, at 2025 hevði minni vind samanborið við í 1991-2020. Vindurin er millum 0,4 m/s (summar) og 0,7 m/s (vetur) minni í 2025 enn 1991-2020. 

Grafarnir niðanfyri vísa miðalhitan í 2025 samanborið við miðalhitan, miðal av minsta hita og miðal av mesta hita í seinasta klimanormal frá 1991-2020, og miðalhitan býtt í árstíðir í 2025 samanborið við klimanormalin fyri 1991-2020. 

Miðalhitin í 2025 var 8,1 stig, tað er 1,1 stig heitari enn klimanormalurin fyri 1991-2020, tá var miðalhitin 7,0 stig. 10 mánaðir í 2025 eru heitari enn klimanormalurin, millum 0,6 stig og 2,4 stig heitari. Bara í januar (-0,6 stig) og november (-0,5 stig) var tað kaldari í 2025 enn í klimanormalinum.   

Serliga februar og desember vóru heitir. Miðalhitin hesir báðir mánaðarnar var 0.4 stig heitari enn miðal av mesta hita í klimanormalinum. 

Áhugavert er at vita, hvussu miðalhitin hevur verið tá ið árið verður býtt í árstíðir. Hetta er samanborið við tríggjar klimanormalar (1961-1990, 1981-2010 og 1991-2020). 

Tað sæst ein klárur tendensur til, at miðalhitin í teimum triðmum klimanormalinum er vaksandi, men 2025 er væl hægri enn allir tríggir klimanormalarnar - millum 0,5 stig og 1,5 stig heitari enn klimanormalurin fyri 1991-2020. Tað ger 2025 til eitt óvanliga heitt ár. 

Grafarnir niðanfyri vísa samlaða avfalli í 2025 samanborið við miðal, mesta og minsta avfallið í 1991-2020, og avfallið býtt í árstíðir í 2025 samanborið við 1961-1990, 1981-2010 og 1991-2020. 

í 2025 kom tað 1117,6 mm avfall, tað er 281,6 mm minni enn miðal fyri 1991-2020, sum var 1399,2 mm. 9 mánaðar var avfallið í 2025 minni enn í klimanormalinum. Einans í mars, mai og juni var tað meira avfall í 2025 enn tað var í klimanormalinum.

Fyri at vita hvussu nógv meira ella minni avfall tað var í 2025 samanborið við klimanormalin, so verður samanborið við mesta og minsta avfall mátað í tíðarskeiðinum 1991-2020:

Tað sæst, at sjálvt um tað regnaði væl meira í mai og juni 2025 enn í miðal í klimanormalinum, so er 2025 ikki í nærheitini av mest málda mai og juni mánaða í tíðarskeiðinum 1991-2020. Haraftur ímóti sæst, at apríl er nær við at verða turrasti máldi apríl samanborið við 1991-2020, einans 1,7 mm meira í apríl 2025 enn minst máldi apríl í klimanormalinum.

Eitt annað áhugavert er at vita hvussu nógv avfall hevur verið tá ið árið verður býtt í árstíðir. Hetta er samanborið við tríggjar klimanormalar (1961-1990, 1981-2010 og 1991-2020).

Tað sæst ein klárur tendensur til, at avfallið í teimum triðmum klimanormalinum er vaksandi, men 2025 er væl lægri enn teir allir tríggir normalarnar. Várið og summarið er nakað tað sama av avfallið, meðan heystið og veturin er har tað er komið týðandi minni avfall í 2025 enn í klimanormalinum.

Eitt savn við mánaðarlig virði úr Havn finst her:

Mánaðarvirði

Eitt savn við árlig virði úr Havn finst her: 

Árlig virði

Met mátaði í tíðarskeiðinum 1873-2024 finnast her: 

Met

Her finnur tú ein lista yvir stormar í Føroyum í 1875-2002:

Stormar

Eitt savn við eldri mátingum (1875-1925) frá ársbókum finst her:

Eldri mátingar frá ársbókum